خلّيك ذكي مش رخيص !
أوقات الركود.. الكل عنده نفس ردة الفعل:
"نخفّض السعر عشان نبيع."
بس خلينا نكون صريحين… مش دايمًا هذا القرار هو الأذكى.
تخفيض السعر أحيانًا بيكسبك صفقة، بس بيخسّرك صورتك، قيمتك، وربما حتى ثقتك بنفسك.
فبدل ما تدخل سباق "مين ينزل أكتر"، جرّب تكون الأذكى بين الكل:
احكي عن القيمة، مش الرقم
ليش منتجك أو خدمتك تستحق السعر اللي حاطّه؟ احكي عن الجودة، الضمان، الخدمة، التفاصيل اللي بتخلّي الزبون يحس إنو عم ياخد شي فعلاً مميز… مش بس "رخيص".
قسّم منتجك لنسختين
اعرض نسخة "خفيفة" للي ميزانيتهم محدودة، وخلي النسخة الكاملة زي ما هي.. هيك بتربح شريحتين، وبتحافظ على قيمة منتجك الحقيقي.
. ضيف بدل ما تخصم
بدل ما تخصم 10 شيكل، جرّب تعطي توصيل مجاني، منتج صغير، أو حتى استشارة، الزبون هيك بيشعر إنه "ربح"، وإنت ما خسرت من سعرك.
العلاقة أهم من الصفقة
الزبون اللي بحس إنك واقف معه، مش بس عم تبيعله، بيرجعلك، ولما يرجع، السعر ما بيكون هو أول همّه.
مش كل الزباين إلك
اللي بدور بس على الأرخص.. مش دايمًا زبونك، ركّز على اللي بدور على الجودة، الثقة، والخدمة، جمهور أصغر.... بس أربح على المدى الطويل.
الخلاصة
لا تكون رخيص، كون ذكي.
السعر مش هو كل القصة… القصة هي أنت، خدمتك، والطريقة اللي بتقدّم فيها القيمة.
السوق بده فَهم… مش خصومات.
ما هي ردة فعلك؟
اعجبني
2
لم يعجبني
0
